Dashte Gurbath Mein Sakina Main Aekla Hogaya

Laash-e-Abbas-e-Ali sey utt kay aaye hain Hussain
Ho chuki duniya andheri kho chukaa hai dil ka chaen
Thaam kar tooti kamar beti sey karthay hain yeh bayn
Nehr par shaaney kattaa kay sogaya tera chacha
Dashte Gurbath Mein Sakina Main Aekla Hogaya

Khoon behjaaney ka koyi gham na tha Abbas ko
Apni nazron mein basaaye tha woh teri pyaas ko
Chott pahounchi haaye meray bhaayi kay ehsaas ko
Beh gaya paani chidda jis waqt mashkeeza tera
Dashte Gurbath Mein Sakina Main Aekla Hogaya

Mainey dekha hai dar-e-khaimey sey uska haal e zaar
Jab hua bey dast mera bhaayi mera ghamgusaar
Har taraf sey har koyi mazloom par karta tha waar
Kis qadar zakhmi hua hai kya kahun Saqqaa tera
Dashte Gurbath Mein Sakina Main Aekla Hogaya

Haal meray bhaayi ka beti karun Main kya bayaan
Jab Main pahuncha woh hayaat o maut kay tha darmiyaan
Sar sey paa takh gurz kay taighon kay bhalon kay nashaan
Aankh mein ek teer tha ek aankh mein tha khoon rawaan
Dashte Gurbath Mein Sakina Main Aekla Hogaya

Kehta tha laasha mera lillaaha khaimon mein na jaaye
Mujhko ab saidaaniyon ka saamna honay na paaye
Yeh guzaarish hai Sakina meray laashe par na aaye
Martey martey uska saqqaa us sey sharmindaa raha
Dashte Gurbath Mein Sakina Main Aekla Hogaya

Har aziyath seh gaye sab bawafa saathi meray
Par jo ghoday sey giraa uskay salaamath haath thay
Yeh museebath haan magar hissey mein thi Abbas kay
Kya bathaoon kaisey ghoday sey zameen par woh giraa
Dashte Gurbath Mein Sakina Main Aekla Hogaya

Karbala mein is taraah aashoor ko majlis huvee
Zikr tha Abbas ka zaakir Hussain Ibne Ali
Bey bason ki aah-o-zaari sey zameen hilney lagi
Kehtey thay Ehsan yehi ro ro kay Shaahey Karbala
Dashte Gurbath Mein Sakina Main Aekla Hogaya