Yeh Majlis e Aza

Karbal ki yaadgaar hai, yeh majlis e aza,

Zainab ka etebaar hai, yeh majlis e aza.

Buniyaan shahzadi ne rakhi thi jiski kal,

Sadiyon ke aasmaan pe jo chagaya woh pal,

Saari ibadaton me wahi khair hai amal,

Momin ka ifteqaar hai, yeh majlis e aza,

Karbal ki yaadgaar hai, yeh majlis e aza (×2)

Khanjar tale hai aakhri sajda Hussain ka,

Hoton pa deen e haq ke hai nauha Hussain ka,

Baqshish ki zimmedaar hai yeh majlis e aza,

Karbal ki yaadgaar hai, yeh majlis e aza (×2)

Har daur ka yazeed raha dushman e aza,

Khud mitgaya mitaa na saka zikr e Karbala,

Dushman pe haq ka waar hai, yeh majlis e aza,

Karbal ki yaadgaar hai, yeh majlis e aza (×2)

Zindan me mehve sajdaa woh beemaar e Karbala,

Woh bandagi ke bol utha mabood marhaba,

Mazool ka sheyaar hai, yeh majlis e aza, 

Karbal ki yaadgaar hai, yeh majlis e aza (×2)

Ehsaas me woh sabr e Sakina liye howe,

Dil hai ek dard o gham ka dafeena liye howe,

Ek chashme ashkbaar hai, yeh majlis e aza,

Karbal ki yaadgaar hai, yeh majlis e aza (×2)

Larzish joh apni palko pe ashk e aza ki hai,

Taaseer inme johar e khaake shifa ka hai,

Har dard ka kharaar hai, yeh maljis e aza,

Karbal ki yaadgaar hai, yeh majlis e aza (×2)

Majlis me chaar su hai wafadri ki fazaa,

Dars e wafa hai zikr e alamdaar e Karbala,

Har bewafa pe baar hai, yeh majlis e aza,

Karbal ki yaadgaar hai, yeh majlis e aza (×2)

Hurr ne diya hai saath samajh kar Hussain ka,

Har ek ke liye hai khula dar Hussain ka,

Har waqt ki pukaar hai, yeh majlis e aza,

Karbal ki yaadgaar hai, yeh majlis e aza (×2)

Auqaat e zulm haske jahaan ko dikha diya,

Naize pe chadke gardane baatil qalam kiyaa,

Asghar ki zulfeqaar hai, yeh majlis e aza,

Karbal ki yaadgaar hai, yeh majlis e aza (×2)

Karte hai hum shujaat e Akbar ka tazkera, 

Qasim ka aur Aun o Mohammad ki jung ka,

Maidaan e karzaar hai, yeh majlis e aza,

Karbal ki yaadgaar hai, yeh majlis e aza (×2)

Parda ulat ke aayenge jab shah e behrobar,

Lenge Imam aate hi unlogo ki khabar,

Jin jin ko nagwar hai, yeh majlis e aza,

Karbal ki yaadgaar hai, yeh majlis e aza (×2)

Ghurbat me dashte zulm me maula howe shaheed,

Hind aane ki tadap dil e sarwar me thi shadeed,

Ashkon ka intezaar hai yeh majlis e aza,

Karbal ki yaadgaar hai, yeh majlis e aza (×2)

Karbal ki yaadgaar hai, yeh majlis e aza (×2)

Zainab ka etebaar hai, yeh majlis e aza.